أكل الأطفال

أكل الأطفال

السلام عليكم يا قمراات

صباحكم جميل و يا رب دايما يكون خير علينا و عليكم ............ النهارده حنتكلم علي موضوع أكل الأطفال من سن سنتين اللي بعد الفطام يعني .... فيه أمهات كتير بتعاني بتقول ان ولادها مش بياكلوا الأكله الفلانيه .. حأديكي شويه أفكار يا رب تنجح و تنفع معاكي .

1-   بالنسبه لمنتجات الألبان: فيه أطفال بتحب الزبادي و فيه أطفال مش بتأكلها ... أنا أولادي بيأكلوا الزبادي بالعسل أو بعملها زي في الصورة كده ...... المهم انهم يأكلوها و اللبن ممكن تعمليه مع فاكهة أو زي البوريو حتجيبي باكو بوريو و تحطي عليه كاكاو و شويه أيس كريم بودر و كوبايه لبن و تضربيهم في الخلاط حيطلعلك أحلي مشروب و حيعجبهم قوي و لو مفيش أيس كريم مفيش مشاكل.. و بالنسبه للجبنة بقه ممكن تدخليها في البيتزا أو معجنات خفيفه أنا بعمل معجنات بعجينة البيتزا و كمان بعجينة الكيزر زي اللي في الصورة و أحشيها جبنة و بتكون مغذيه و مفيده جدا.

2-   بالنسبه للفاكهة و الخضار : فيه أنواع أطفالنا مش بيأكلوها عندي بودي مش كييف موز بس أنا بعملهوله مع الزبادي أو بجيب كوبايه كريم شانتيه أقطع موز صغير و أقلبه مع معلقه من الكريمة بيعجبوه قوي ... و ممكن تعملي سلطة فواكه و تقطعي الفاكهة حتت صغيرة و عليها عصير مانجا و كريمة ( ان شاء الله قريب حأنزلها في الموقع ) ..ممكن تدخليها في الكيك زي كيكه الموز و تكون مغذيه برضه... الخضار لازم يتعودوا يأكلوه سلطة أو حتي مع الرز و ممكن تقطعيه صغير و تعمليه سوتيه جوه قالب الكفته اللي نزلت وصفته حيأكلوه و حيعجبوهم عشان حتت صغيره مش باينه ...... و ممكن تضيفيه للشوربه زي شوربه العدس أنا بحط كوسا مع الخضار أقول منها زياده في القيمة الغذائيه و كمان مش بيأثر علي الطعم .

3-   البيض: فيه أطفال مش بتحب البيض من غير سبب كده ... انتي بقه تدخليه في البانكيك ( موجوده وصفته ) أو في الكيك و ممكن تشتري طاسه علي شكل مضحك زي اللي في الصورة دي مش غاليه كنت جايباها ب 10 جنيه بس بطلع شكل البيض حلو و بعمل عيون و فم و بيعجب الأولاد قوي زيزو ملوش في البيض بس بيحبه كده. البيض المسلوق أنا مش بيقدمة زي ما هو لالالا بقطعه بالقطاعه دي عشان الصفار دايما هو اللي عامل مشكله مع الأولاد أخت جوزي ما شاء الله بنتها أكلته بالطريقه دي .

4-   المكسرات : طبعا فيه ولاد مش بيحبوها لو اتقدمت كده مش حتعجبهم ... عندك السوداني تدهني زبده الفول السوداني في سندوتش حتكون حلوة أو مع الحلويات ( قريب حأنزل طريقتها ان شاء الله ) ... الزبيب أنا بعمله مع الرز أو في معجنات حلوة زي اللي في الصورة أو في الكيك طبعا ... مع فطيره التفاح حيكون حلو قوي ... جوز الهند ممكن تعملي بيه بسيمة أو كيكه أو بسكويت أنا عملت بسيمة و حطيت عليها موز زياده في القيمة الغذائيه ولادي أكلوها ما شاء الله عن كل مرة ..

5-   اللحوم: طبعا في ولاد مطلعين عين مامتهم من الموضوع ده فا ممكن تجيبي الفراخ و تعمليها ناجتس أو كفته حتعجبهم قوي ...و مشكله الأولاد مع اللحمة دايما انها تكون ناشفه فالبفتيك حيعجبهم قوي أو حتي الستيك اختاري حتت طريه ليهم زي الموزة أو من الفخده.

6-  الأسماك: زي بودي اللي مطلع عيني في السمك و ده علي كبر طبعا فالبديل ممكن سمك فيليه و ممكن كفته السمك حتتأكل و ان شاء الله حتعجبهم .

يا رب أكون أفدتكم و أي استفسار يا قمرات ابعتي اسأليني و ان شاء الله حأفيدك و سلام