بتشتري حاجات البيت ازاي؟

بتشتري حاجات البيت ازاي؟

 

b1

 

السلام عليكم

ازيكم يا قمرات ... النهارده حنتكلم عن موضوع مهم و ان شاء الله نسنتفيد كلنا منه و هو ازاي بتشتري حاجات البيت . فيه كام خطوة كده عايزين نعرفهم سوا ... أنا بقالي 3 سنوات بشتري حاجات البيت من الأبره للصاروخ ههههههه ممكن ناس تقول دي خبره قليله بس أنا حأقدم اللي عندي و ان شاء الله يكون فيه افاده للجميع.

بسم الله

1-   قبل ما تروحي تيجبي حاجاتك الشهريه نظفي التلاجة و شوفي ايه اللي موجود و ملوش لازمه و ايه اللي ممكن يكون مستخبي هنا و الا هنا ( حصل معايا اني اشتريت حاجة و لما رتبت التلاجة لقيت زيها)

2-   اعملي جرد و شوفي ايه اللي ناقص عندك و لو لسه في كميه قليله من أي صنف احسيبيها شوفي حتكفي باقي الشهر أو نص الشهر و كده يعني.

3-   امسكي ورقه و قلم و اكتبي حاجاتك بالتفصيل شوفي حتيجبي بالشهر و الا بالأسبوع.

4-   اوعي تروحي تتسوقي و انتي جعانه عشان حتيجبي حاجات كتيره ملهاش لازمة .... لو بتروحي الصبح افطري و انزلي حتي تهضمي الفطار ههههههههههههه

5-  نراعي و احنا بنشتري الأتي :

أ‌-     تاريخ الصلاحيه . و طبعا مش يكون بعيد قوي و نشوف تاريخ الأنتهاء.

ب‌-   مكونات الصنف ده لو فيه مواد صناعيه كتير يا ريت نبعد عنه حرصا علي سلامتنا و سلامة أولادنا.

ت‌-    الأسعار . نقارن و نشوف لو نفس الجودة طبعا الأقل أوفر.

ث‌-    وزن العبوة . عشان ممكن تكون سعرها أرخص بس أقل في الوزن.

6-  الأجبان: قارني بين النوع اللي بالسايب و النوع المغلف طبعا من حيث الجوده و السعر و الوزن و كمان لو الحاجة دي بتطول عندك فالأفضل تيجبي المغلف عشان مش حيتفتح و يتعرض للهوا الا ساعه الأستعمال.

7-  المجمدات : دايما اشتريها أخر حاجة عشان مش يسيح التلج و يرجع يجمد تاني و خدي بالك مش تأخدي الكيس اللي فيه الحاجة لازقه في بعض معني كده انه كان مجمد و فك و رجع جمد تاني.

8-  البقاله: قارني بين الحاجات و شوفي اللي بيريحك أكتر و يكون مناسب هاتيه .... أنا بعمل ايه بالأضافه لحاجات الشهر بجيب كيس صلصله و كيس طحينه و كيس بودنج اللي هيا بجنيه دي و أخليه عندي عشان وقت ما أتزنق في حاجة من دول و صعب أجيب عبوة أستعملها.

9-  مواد التنظيف : طبعا دي حسب احتياجك الشهري .

10-    المعلبات: خدي بالك مش تأخدي عبوة مضروبه من الجنب أو صلاحيتها قريبه معني كده انها فضلت في الماده الحافظه دي كتير .

11-   العطارة: طبعا تكون من مكان مضمون عشان التخزين و اذا استهلاكك فيها قليل احفظيها في التلاجة مش بيحصلها حاجة ماما الله يرحمها كانت لما بنسافر أجازة مصر من الكويت يتحط كل الحبوب و الدقيق في التلاجة عشان مع الحر بيسوس.

12-   البرطمانات: خدي بالك و دوسي علي غطا البرطمان من فوق و اتأكدي انه مضغوط و مش بيطلع هوا عشان لو مش كده حتلاقي العبوة فاسده.