عندك عزومة ؟

3ezoma

 

السلام عليكم و رحمه الله و بركاته

 

ازيكم النهارده يا قمرات؟ ان شاء الله تكونوا في أحسن حال . النهارده حنتكلم عن موضوع حلو و مهم خصوصا للبنوتات الحلوين اللي لسه حيتجوزوا ان شاء الله..

حنتكلم ازاي نرتب لعزومة.

 

عندي عزووومة !!! أكيد حتحسي انه عندك هم مش قصدي هم يعني من الناس و الا حاجة و الله قصدي هم التفكير في الأكل و الترتيب و كلنا عايزين كل حاجة تظهر في أجمل صورة ..

بسم الله نبدأ

1-     حنجيب أجنده كده نكتب فيها عدد الأفراد و الأطفال طبعا لو فيه .

2-     نحدد نوع الأكل : يعني لو فيه حد نباتي أو عنده مريض سكر أو ضغط لازم نراعي ..... نراعي كمان اذا كانوا جايين من سفر أو من بلد تانيه و نوع الأكل بتاعهم يعني مش أعمل أكل ايطالي لناس عمرها ما سمعت عنه ... لازم الأطباق تكون منوعه رئيسيه و سلطات و مقبلات و طبعا لو الجو يسمح نوع شوربه و الحلويات.

3-     الجو: طبعا مش نعمل حاجات تقيله و الجو حر موت ههههههه و لا حاجات بتبرد بسرعه و بيكون ملهاش طعم و الدنيا تلج بره .

4-     الميزانيه: طبعا لازم نكون حاطين ميزانيه للعزومة دي .... و الميزانيه تكون شامله كل شيئ في العزومة.

5-     تكتبي كل طبق و تحته الحاجات اللي حنشتريها للطبق ده و بعد كده تجمعي يعني الخضار و الفاكهة في ورقه واحده عشان حيتجابوا من مكان واحد و البقاله هكذا و كمان اللحوم و الأسماك و الفراخ.

6-     تختاري أطباق انتي متمكنه منها مش حتعمليها لأول مرة و لو فيه أنواع جديده ممكن تجربيها قبلها .

7-     اختاري حلو مناسب و لو ملهومش في الحلو و انتي عارفه كده استبدليه بالفاكهة .

8-     فيه أطباق ممكن تتحضر قبلها بيوم يا ريت تعملي كده عشان مش تعكي نفسك يوم العزومة.

9-     أنا بكتب في الأجنده خطوات الأطباق يعني مثلا تحمير أو بشر أو تقطيع و لما أعمل الخطوة دي بشطب عليها عشان أسهل علي نفسي.

10-       نيجي للسفرة : أنا بكتب في لسته الأطباق اللي أنا محتاجها و السرفيس اللي حأقدم فيه الأكل و كل حاجه و مكان اللي أنا حاطاها فيه و لما أولادي بيناموا ( طبعا ليله العزومة لازم يناموا بدري ههههههه ) أطلع الحاجات و أرصها فوق بعض و أغطيها بفوطة نضيفه.

11-     عندي العزومات بتكون منفصله رجاله لوحدهم و ستات لوحدهم ( تصدقوا أريح مليون مرة علي الأقل أكل برحتي ) فبعمل حسابي في السرفيسات و كوبايات الميه و الشفشق اللي حيتحط فيه ميه لازم يكونوا اتنين و كده يعني .

12-     لو العزومة منفصله : أنا بحضر ترمش شاي و كوبايات صغيرة و سكر في صينيه شيك و أحطها في المكان اللي رجاله حيقعدوا فيه عشان لما يخلصوا أكل يكون الشاي جاهز ( أهل جوزي بيحبوا الموضوع ده قوي هههههههه )

13-      نيجي بقه للبيت:

     1- الحمام ( اعزكم الله ) يتنضف و يتحط صابونة جديده لو الصابونة اللي موجوده صغيرة و فوطة جديده قبل ما يجوا الضيوف و ورق تواليت و لو العزومة فيها أسماك يا ريت يتحط زجاجه برفان أو ميه ورد مخففه .

   2- الصالون أو مكان الأستقبال : حيتنضف و لو غرفه مقفوله تتعطر بالبخور الهادي و تتهوا و تتقفل .

3- السفرة : حتترص الأطباق و تحتها المفارش و فوط السفرة تتلف بطريقه حلوة شيك و كمان أنا بحط السرفيسات و هيا فاضيه عشان أظبط أماكنها لما أغرف فيها الأكل و مش أحتاس.

 و طبعا مش تنسي نفسك و تحضري حتلبسي ايه من قبلها حاجة حشمة و مريحه و ألادك و جوزك كمان و ان شاء الله حتكون عزومة مفيش أحلي من كده  ( دي صورة من سفرتي علي فكرة )