سمك فيليه بالكريمه و الليمون

السلام عليكم يا قمرات

النهارده معنا سمك فيليه بطريقه جديده ان شاء الله تعجبكم سهله و سريعه جدا

المقادير:

1/2 كيلو سمك فيليه قشر بياض أو أي نوع / 3 كلاعق كبيره كريمه لباني / كزبره خضرا / توم و ليمون و ملح و كمون / زبده / عصير ليمون

الطريقه:

1-    نتبل السمك بالتوم و الكمون و الملح و الليمون.

2-    نحضر الطاسه و نسيح الزبده.

3-    نضيف السمك و نقلبه علي الوشين لحد ما يستوي و يأخد لون تحمير.

4-    نضيف الكريمه و نقلب و نضيف لبن لو احتاج .

5-    نضيف عصير الليمون .

6-    نقلب و نضيف الكزبره الخضرا المفرومة و نقلب و نطفي النار.

7-    نقدمها مع رز أبيض و سلطه.

يا رب تكون عجبتكم

صدور دجاج بالجبنة الشيدر

السلام عليكم يا قمرات

النهارده عملت اختراع كده و طلع جميل جدا و سهل و سريع

المقادير:

نص كيلو صدور فراخ / شرايح جبنه شيدر / ملح و فلفل و بهار و كاري و صوص صويا و ورشستر صوص و ليمون / زعتر بري

الطريقه:

1-    حنقطع الفيليه قطع كبيره شويه و نتبلها بالبهارات و الليمون اللي فوق و نسيبها فتره .

2-    حندهن القالب بالزيت و نرص الفراخ و ندخلها الفرن و نغطيها بورق قويل لمده 20 دقيقه.

3-    نطلعها و نحط عليها الجبنه و ندخلها تاني بس بدون ما نغطيها لمده 5 الي 10 دقايق عشان الجبنه تسيح .

4-    نقدمها مع المكرونة و هيا سخنه .

يا رب تكون عجبتكم

كفتة بالطحينة

السلام عليكم

النهارده معنا كفته بالطحينه كانت ماما الله يرحمها دايما تعملها حلوة جدا

المقادير:

1/2 كيلو لحمه مفرومة / نص حبه فلفل رومي / نص حبه طماطم متوسطه / حبه بصل متوسطه / ملح و بهار و فلفل و صوص صويا / بطاطس شرايح/ سلطه طحينه

الطريقه:

1-    نضرب البصل و الطماطم و الفلفل بالهند بلندر و نضيفه علي اللحمه .

2-    نتبلها بهار و ملح و فلفل و نقلبها كويس.

3-    نتبل شرايج البطاطس بالملح و الفلفل و نفردها في القالب.

4-    نصبع الكفته و نرصها.

5-    ندخلها الفرن لمده 15 دقايق .

6-    في خلال العشر دقايق نحضر سلطه الطحينه زي ما موجوده الوصفه في السلطات.

7-    نصب الطحينه علي الكفته و ندخلها الفرن تاني لمده 5 دقايق

يا رب تكون عجبتكم

دجاج باربكيو

السلام عليكم 

معنا فراخ باربيكيو جميله جدا و سهله

المقادير:

عدد 4 وراك / ربع كوب تتبيله ايطاليه / صوص باربيكيو / زيت .

الطريقه:

1-    ننظف الوراك كويس و نتركها في ملح و ليمون لفتره.

2-    نغسلها من الملح و الليمون و نتبلها بصوص التتبيله الايطاليه .. الوصفه موجوده في المقبلات,

3-    نحفظها في كيس في التلاجه لفتره لا تقل عن 2 ساعه.

4-    ندخلها الفرن و أول ما الجلد يتحول للون النضج نجهز صوص الباربيكيو و الوصفه موجوده في المقبلات برضه.

5-    و كل شويه ندهنها بالفرشاه لحد ما تستوي.

6-    نقدمها مع رز بالبسله و خضار سوتيه

يا رب تكون عجبتكم

رز تكا

السلام عليكم يا قمرات

النهارده معنا رز تكا اللي بالقرنفل ده بجد روعه و نفس الطعم

المقادير:

2 كوب رز بسمتي نوع جيد / ملح / عدد 5 حبات قرنفل / حبهان مطحون ربع م صغيره / ماء دافي للتسويه / زيت / 1 م صغيره كركم

الطريقه:

1-    نسخن الزيت في الحله و نضيف القرنفل و الحبهان و نقلب كويس.

2-    نضيف الرز بعد ما نغسله بدون نقع.

3-    نضيف الكركم و نقلب جيدا.

4-    نضيف الماء علي حيب نوع الرز فيه نوع بيأخد موب و نصف لكوبايه الرز و نوع بيأخد 2.

5-    نتركها تغلي علي نار عاليه و بعد ما يتشرب نوطي النار و نتركها تستوي .

6-    نقدمها مع فراخ تكا.

يا رب تكون عجبتكم

ملحوظه انا استخدمت رز اسمه دعوات بجد روعه لون الكيس احمر

شاورما دجاج

السلام عليكم يا قمرات

معنا شاورما فراخ في خبز الصاج

المقادير:

1 بصله كبيره مقطعه شرايح رفيعه / 1 فلفله رومي مقطعه شرايح رفيعه / 350 جرام فراخ بانيه مقطعه حتت صغيره / ملح و فلفل و بهارات و صوص صويا / عصير ليمون / 1 م سماق / 2 م كبيره بقدونس ناعم / زيت

الطريقه:

1-    نسخن الطاسه و نضيف الزيت و البصل و نتبل البصل ملح و فلفل.

2-    بعد ما يدبل البصل نضيف الفراخ و نتبلها بهارات و سماق و عصير ليمون و ملح و فلفل.

3-    نقلبها كويس علي النار و نضيف الفلفل الرومي و نقلبها كويس .

4-    نضيف البقدونس و نقلب و نطفي النار .

5-    نحضر ساندويتش الشاورما : ندهن خبز الصاج بالمايونيز و نضع الفراخ و نلفه و يقدم مع بطاطس محمرة و مخلل.

يا رب بكون عجبكم

مكرونة بالوايت صوص

السلام عليكم يا قمرات

معنا مكرونة بالوايت صوص تتقدم مع بيكاتا أو بانيه .

المقادير:

كيس مكرونة 400 جران بينه / كريمه لباني / بقدونس مفروم ناعم / زبده / ملح و فلفل أسمر/ 1/4 كوب لبن

الطريقه :

1-    نسلق المكرونة في ميه و ملح و نصفيها.

2-    نسيح الزبده و نضع عليها الكريمه و اللبن و نخليها تغلي غلوتين.

3-    نضيف البقدونس الناعم و الملح و الفلفل.

4-    نقلب فيها المكرونة و تقدم ساخنه.

يا رب تكون عجبتكم

صدر ديك رومي بالزبده و الليمون و الكزبره الخضرا

السلام عليكم يا قمرات

معنا طريقه سهله و لذيذه

المقادير :

1/2 كيلو صدر ديك رومي / عصير ليمون / زبده / بهارات و ملح و فلفل / كزبره خضرا مفرومة ناعم / 1/4 كوب لبن

الطريقه :

1-     نقطع الصدر الي شرايح رفيعه .

2-     نحضر التتبيله باضافه ملح و فلفل و جنزبيل و كاري و بابريكا و قرفه و صوص الصويا,

3-     ننقع شرايح الديك الرومي في التتبيله لمده لا تقل عن ساعه .

4-     نضع زبده في الطاسه و نشوح الصدور علي الجانبين لحد ما تستوي.

5-     نضيف عصير الليمون.

6-     نضيف الكزبره الخضرا

7-     نضيف الكريمه اللباني و اللبن

8-     و نقلبها و تقدم ساخنه

يا رب تكون عجبتكم

دجاج محشي  و محمر

معنا فراخ محشيه رز و محمره وصفه ماما الله يرحمها طبعا بدون سلق في الفرن علي طول

المقادير:

2 فرخه وزن كيلو / 1 بصله متوسطه مفرومة / كوب رز / 2 و نص كوب ماء / ملح و بهار و زبده لتلميع الوش

الطريقه:

1-    نشوح البصله علي النار في الزيت و عليها ملح و فلفل و بهار و صوص وصويا.

2-    نحط عليها كوبايه الرز و نققلب كويس و نحط نص كوبايه الميه و نسيبها تغلي علي نار عاديه لحد ما تتشرب الميه و نطفي عليه.

3-    نقطع الفرخة بالطول يعني ورك و صدر و ورك و صدر و نتبلها ملح و فلفل و نبدأ نفرغ بين الجلد و اللحم و نحشي رز و مش نحشي كتير عشان الرز يستوي كويس.

4-    ندهن الوش بالزبده أو السمنه او حتي زيت

5-    نحضر القالب و نحط الفراخ و نحط في القالب 2 كوبايه ميه .

6-    نغطيها بورق الومونيوم كويس و ندخلها فرن سخن و نسيبها لمده لا تقل عن ساعه علي نار متوسطه.

7-    نختبر الرز و و نرفع الورقه و نحمرها تحت الشوايه .

 يا رب تعجبكم

كشري مصري

السلام عليكم يا قمرات

معنا كشري مصري مفيش ألذ من كده

المقادير :

كوبايه رز / شعريه / نص كيس مكرونة / كوبايه عدس بجبه / نص كيلو طماطم معصوره عليها م كبيره صلصه / ملح و فلفل / بصل مقطع شرايح / دقيق نص راس توم مدقوق ناعم/ خل

الطريقه :

1-     نحمر الشيعريه و نقلب معاها الرز و نغطيه بالميه و نسيبه يستوي.

2-     ننقع العدس لمده ربع ساعه.

3-     نسلق المكرونة و نشيلها علي جنب.

4-     نسلق العدس و بعد ما يستوي نشطفه بالماء و نضيف عليه كمون و ملح.

5-     نقلب البصل في الدقيق و نقليه في الزيت.

6-     نضيف الزيت للحله و نقلب الثوم حتي ياخد لون بسيط و نضيف شويه خل و بعد كده الطماطم.

7-     نتركها تتسبك علي النار حتي تصل للسمك المطلوب.

8-     نضيف ملح و كمون و فلفل اسمر

9-     نقدم الطبق زي الصورة ممكن اضافه كبده اسكندراني.

 يا رب تكون عجبتكم

مكرونة نجرسكو

السلام عليكم يا قمرات

النهارده معانا مكرونة نجرسكو حلوة و خفيفه جدا

المقادير :

1/2 كيلو وراك مخليه / 4 ملاعق كبيره مشروم / 400 جرام مكرونة أقلام / مقدار بشامل  / ملح و فلفل و بهارات فراخ / جبنة موزاريلا للوجه

الطريقه :

1-     حنحضر الطاسه و نضع الزبده و و من ثم قطع الدجاج.

2-     نتبل الدجاج ملح و فلفل و بهارات .

3-     نحركها جيدا حتي تختلط بجميع البهارات .

4-     نضع المشروم و نقلب جيدا.

5-     نسلق المكرونة و نصفيها و نتركها جانبا.

6-     نحضر البشامل و نقلب جزء مع المكرونة و الفراخ و نضع المكرونة في القالب.

7-     نضع باقي البشامل علي الوش و الجبنة  و ندخلها فرن لمده 20 دقيقه.

8-     نقدمها مع سلطة .

 ملحوظة ( مقدار البشامل .. 2 مكعب زبدة / 6 أكواب لبن / 10 ملاعق دقيق كبيره / ملح و فلفل )
يتم وضعهم سويا علي النار و نستمر في التحريك الي انا تظهر فقاقيع الهواء علي الوجه و بذلك يكون نضج و نستخدمها علي الفور

سمك فيليه

السلام عليكم يا قمرات

معانا سمك فيليه بالبقسماط حلو و خفيف بجد

المقادير :

كيلو سمك فيليه / 2 م كبيره كاتشاب / عصير ليمونتين / ملح و فلفل و كمون / 2 فص توم مفرومين / بقسماط

الطريقه :

1-     حنقطع السمك حتت و نغسله و نسيبه علي جنب .

2-     حنحضر التتبيله بأضافه كل المقادير اللي فوق .

3-     حنتبل السمك و نسيبه مش اقل من ساعه .

4-     حنحضر البقسماط و نكون حاطين السمك في مصفاه عشان ينزل الميه اللي فيه .

5-     نسخن الزيت كويس و مش زيت غزير زيت عادي زي الصورة كده

6-     نتبل السمك بالبقسماط كويس و ننزله في الزيت .

7-     منحاولش نقلبه علي الناحيه التانيه الا لما أطرافه تتحمر عشان البقسماط من يقع منه.

8-     النار تكون متوسطة لا عاليه و واطيه.

9-     يا ريت ننفضه من البقسماط كويس قبل ما نحمره عشان البقسماط اللي بيقع في الزيت بيخللي الزيت يتحرق.

10-نقدمه مع رز ابيض أو رز بالبسله و سلطة

يا رب يكون عجبكم

طاجن لسان عصفور بالكفتة

السلام عليكم يا قمرات

النهارده معنا طاجن لسان عصفور بالكور الكفته اختراعي بس جميل جدا الأولاد حبوه قوي.

المقادير:

¼ كيلو مفروم / 2 بصله مفرومة متوسطة مفرومة ناعم / ملح و فلفل و بهارات / لسان عصفور / شوربه فراخ أو مرقه / زيت لتحمير لسان العصفور

الطريقه:

1-     نحضر الكفته نخلط البهارات و اللحمة و البصل.

2-     نكورها و نسويها في الطاسه و نسيبها علي جنب.

3-     نحمر لسان العصفور في الحله .

4-     نحضر الطاجن و نحط فيها الكفته و لسان العصفور المتحمر.

5-    نضيف عليها شوربه الفراخ ( او المرقه و مدوبه في ميه سخنة .

6-    نسخن الفرن و ندخلها فيه.

7-    نسيبها لحد ما لسان العصفور يستوي و تأخد لون خفيف و تقدم .

يا رب تكون عجبتكم

بيكاتا دجاج بالمشروم

السلام عليكم يا قمرات

النهارده معنا بيكاتا صدور الفراخ بالمشروم

المقادير:

½ كيلو فيليه فراخ / 3 ملاعق كبيره كريمة لباني أو كريمة طهي /ملح / فلفل / بابريكا / صوص صويا / قرفه / زبده / مشروم/ 1 م ك دقيق مدوبه في نص كوب ماء

الطريقه:

1-     نتبل الصدور بالبهارات اللي فوق.

2-     نحضر الطاسه و نجيب زبده نسيحها .

3-     نحط الصدور و نسيبها تتحمر علي أول ناحيه و بعد كده نحمرها علي الناحيه التانيه و نحط شويه ميه عشان تستوي.

4-     نشيل الفراخ من الطاسه و نحط الكريمة و نتبلها ملح و فلفل.

5-     نحط الميه و الدقيق.

6-     نحط المشروم و نسيبها علي النار 3 دقايق.

7-     نضيف الصدور و نقلبها و نخليها تغلي غلوتين و نطفي النار .

8-     نقدمها مع رز أبيض و كلو سلو.

يا رب تكون عجبتكم

باذنجان بالباشمل

السلام عليكم يا قمرات

معانا بتنجان بالباشمل و ممكن يتعمل دايت كمان .

المقادير:

½ كيلو بتنجان رومي/ ربع كيلو مفروم / زيت لدهن البتنجان/ 2 بصله مفرومة ناعم / 3 كوب حليب / 5 م كبيره دقيق / 1 م كبيره زبده / ملح و فلفل/ بهارات ( قرفه و كبابه صيني بابريكا )

الطريقه :

1-     نقطع البتنجان شرايح و نرش عليه ملح و نتركه علي جنب.

2-     نحضر العصاج ... نحط م كبيره زيت و عليها البصل الناعم .

3-     نضييف البهارات مع الملح و الفلفل لحد ما البصل يدبل.

4-     نضيف المفروم و نسيبه علي النار يستوي.

5-     نحضر صينيه و نغلفها بالفويل و ندهنها كويس بالزيت و نرص البتنجان .

6-     ندهن وشه و ندخله الفرن و هو سخن جدا .

7-     نقلبه علي الناحيتين و نلاحظ انه حيلزق في الورق .. مفيش مشكله لما يبرد حيطلع بسهوله.

8-     نحضر الباشمل نحط اللبن و الدقيق و الزبده و نضربهم بالمضرب علي النار و نقلب.

9-     لما يتقل الباشمل نطفي النار و نضيف الملح و الفلفل.

10-         نحضر القالب و نحط طبقه بشامل و طبقه بتنجان و المفروم.

11-    نحط طبقه البتنجان التانيه و نصب باقي الباشمل.

12-     ندخلها الفرن تستوي درجة حرارته متوسطة

13-    نقدمها و هيا سخنة ممكن مع مكرونة بالصلصه أو بالعيش .

يا رب تكون عجبتكم